Дар Смолний ду шаҳрдор бо ҳам вохӯрданд

Душанбе, 15 апрел.(АМИТ «Ховар», Марзия Саидова).-Тавсеаи робитаҳои ҳасанаи ду бародаршаҳр –Душанбею Санкт-Петербург дар меҳвари мулоқоти Маҳмадсаид Убайдуллоев — раиси Маҷлиси Маҷлиси миллии Маҷлиси Олии ҷумҳурӣ, раиси шаҳри Душанбе ва Георгий Полтавченко- губернатори Санкт-Петербург қарор дошт. Мусоҳибон дар ҷараёни мулоқот масъалаҳои тақвияти ҳамкориҳои мутақобилан судманди Душанбею Санкт-Петербургро дар бахшҳои мухталиф баррасӣ намуда, омодагии хешро ҷиҳати таҳкими муносиботи судманд ироа доштанд. Таъкид гардид, ки тарафҳо баҳри амалӣ сохтани ҳадафҳои созандае, ки аз Созишномаи ба тасвибрасидаи ду бародаршаҳр –Душанбе ва Санкт-Петербург дар бораи ҳамкориҳои иқтисодӣ, илмию техникӣ ва фарҳангӣ бармеоянд, тадбирҳои муассирро роҳандозӣ менамоянд. Мулоқот, ки дар қасри Смолний сурат гирифт, дар фазои созанда ва ҳусни тафоҳум анҷом пазируфт. Мавриди зикр аст, ки Душанбе бо Санкт-Петербурги Русия 6 октябр соли 1991 паймони бародаршаҳрӣ бастааст.