Донишҷӯёни ДДТТ-соҳиби мақоми аввал

Душанбе, 3 апрел. (АМИТ «Ховар», Раъно Нусратуллоева).-Донишҷӯёни Донишгоҳи давлатии тиббии Тоҷикистон ба номи Абӯалӣ ибни Сино бо ширкат дар даври дуввуми озмуни минтақавии «Рақобати донишомӯзӣ дар Интернет–олимпиадаи байналмиллалӣ», ки аз 22 то 27 марти соли ҷорӣ миёни кишварҳои Русия ва Осиёи Марказӣ гузашт, бо ба даст овардани панҷ медали тилло чун ғолибони озмун эътироф шуданд. Озмуни байналмилалӣ дар шакли тестӣ ва бо истифода аз хати муоширати ҷаҳонӣ миёни донишҷӯёни риштаҳои улуми макотиби олӣ баргузор шуд. Миёни фанҳои таълимие, ки дар озмун пешниҳод гардиданд, донишҷӯёни донишгоҳи тиббӣ аз риштаи химия баромад намуданд.   Ҳамаи 5 нафар донишҷӯи Донишгоҳи тиббӣ ба мақоми аввал сазовор шуда, соҳиби медали тилло гардиданд, ки инҳо: Шаҳбоз Зулфалиев, донишҷӯи курси дуюм, Шаҳбоз Ёқубов, донишҷӯи курси сеюм, Дилафрӯз Саидалиева, донишҷӯи курси якум, Раҳимҷон Абдуллоев, донишҷӯи курси якум ва Меҳриёр Комилов, донишҷӯи курси якум буданд. Ҳамзамон Шаҳбоз Зулфалиев, донишҷӯи соли дуввуми донишгоҳ бо ширкат дар сабқати озоди минтақавӣ (бидуни назардошти мушаххасоти таҳсил) ширкат намуда, дар байни Иттиҳоди Давлатҳои Мустақил ба мақоми аввал лоиқ дониста шуд. Зимнан дар давоми се соли охир донишҷӯёни донишгоҳи тиббӣ бо иштироки фаъол дар олимпиадаҳои фаннии ҷумҳуриявӣ пайваста ғолиб омада, сазовори мақоми дуввум миёни сӣ муассисаи таҳсилоти олии кишвар мешаванд. Ва ин бурди навбатии донишҷӯёни донишгоҳ далели дигаре аз баланд гаштани сатҳу сифати таълим ва натиҷаи мусбати ширкати онҳо дар олимпиадаҳои дохилӣ ва байналмилалист.