Донишҷӯёни тоҷик дар Форуми Одесса

Анқара, 30 апрел. (АМИТ «Ховар», Фарангис Раҳимова). – Ду нафар донишҷӯёни тоҷики муҳассили Туркия дар мусобиқаи варзишӣ дар Форуми дуюми донишҷӯёни Тоҷикистон, ки аз 26 то 28 апрел дар шаҳри Одессаи Ҷумҳурии Украина баргузор гардид, ҷойҳои аввалро ишғол намуданд. Форум бо ибтикори Сафорати Тоҷикистон дар Украина баргузор гардида, дар он беш аз 250 нафар донишҷӯёни Тоҷикистон, ки дар Украина, Русия, Беларус ва Туркия таҳсил мекунанд, иштирок намуданд.Дар ҳошияи форум конфронси илмию амалӣ бахшида ба такмили ихтисоси кормандони соҳаҳои муҳимтарини Тоҷикистон доир гардид. Ҳамчунин мусобиқаи варзишии донишҷӯён аз рӯи футбол, волейбол, баскетбол, шоҳмот, гӯштингирӣ ва ғайра роҳандозӣ шуд.Қобили зикр аст, ки Форуми аввалини донишҷӯёни Тоҷикистон дар донишкадаҳои олии Украина моҳи апрели соли 2012 дар шаҳри Харков баргузор шуда буд.