Дубай хоҳони ҳамкорӣ бо Тоҷикистон аст

Душанбе, 4 апрел. (АМИТ «Ховар», Покиза Маҳмадбекова). – Чанде пеш дар шаҳри Душанбе раиси Палатаи савдо ва саноати ҶТ Шариф Саид ва ноиби президенти Палатаи савдо ва саноати Дубай Ҳасан Алӣ Ҳошимӣ масоили рушди муносибатҳои тиҷоратию иқтисодии Тоҷикистон ва Дубайро мавриди муҳокима қарор доданд.Тавре ки аз Палатаи савдо ва саноати ҷумҳурӣ ба АМИТ «Ховар» хабар доданд, Шариф Саид дар ҷараёни мулоқот аз фаъолияти палата, нишондодҳои макроиқтисодии ҶТ ва самтҳои афзалиятноки иқтисодиёт нақл кард. Ҷонибҳо зикр намуданд, ки барои рушди ҳамкорӣ имкониятҳои зиёде мавҷуданд. Ҳар ду давлат бӯҳрони молиявиро бартараф намуда, Тоҷикистон 11 марти соли 2013 узви ваколатдори Созмони умумиҷаҳонии савдо гардид. Ҳасан Алӣ Ҳошимӣ дар мавриди захираҳои табиии Тоҷикистон сухан ронда, гуфт, ки Дубай хоҳони ҳамкорӣ бо Ҷумҳурии Тоҷикистон аст. Ҳамчунин имконияти доир намудани ҷаласаи аҳли тиҷорати ҳар ду кишвар дар шаҳри Душанбе мавриди муҳокима қарор гирифт. Шариф Саид пешниҳод намуд, ки дар рӯзҳои ин чорабинӣ дар шаҳри Дубай намоишгоҳ доир карда шавад.