Фестивали донишҷӯёни тоҷикистонӣ дар Туркия

Душанбе,25 апрел. (АМИТ «Ховар», Фарзонаи Давлат)-7-умин Фестивали донишҷӯёни тоҷик дар Донишгоҳи байналмилалии Анталия баргузор гардид,ки дар он донишҷӯёни тоҷик бо маҳорати варзишию шеърхонии худ миёни ҳам рақобат карданд.Дар ҷашнвора чорабиниҳои фарҳангӣ ва варзишӣ, аз қабили мусобиқаи футболбозӣ байни гуруҳҳо, озмуни шеърхонӣ аз ашъори Ҷалолиддини Румӣ, муаррифии пешрафту дастовардҳои Тоҷикистон гузаронида шуд.Дар фестивал, ки аз 19 то 21-уми апрел идома кард, устодони Донишгоҳи байналмилалии Анталия , муовини раиси ҳукумати шаҳри Анталия, намояндагони Консулгарии генералии Тоҷикистон дар шаҳри Истанбул ва зиёда аз сад нафар донишҷӯи тоҷик, ки дар муассисаҳои олӣ ва миёнаи Ҷумҳурии Туркия таҳсил менамоянд, иштирок карданд.Чорабинии мазкур бо дастгирии ширкати омӯзишию парваришии «Шалола» ва сафорати Тоҷикистон дар Туркия гузаронида шуда, дар интиҳои ҷашнвора ғолибони озмунҳо бо туҳфа ва дипломҳо сарфароз гардиданд.