Фирор баъди куштор

Душанбе, 9 апрел. (АМИТ «Ховар», Музаффар Рустамов).–4 апрели соли 2013 соати 4.40 дақиқа дар ноҳияи Ҳисор мошини тамғаи номаълум ҳангоми ҳаракат дар кўчаи Берунӣ пиёдагард Собир Камоловро зер намуда, аз ҷои ҳодиса ғайб мезанад, ки дар натиҷа пиёдагард ҷароҳати вазнини ҷисмонӣ бардошта, дар ҷои ҳодиса ба ҳалокат мерасад. Ҳангоми гузаронидани корҳои фаврию ҷустуҷӯӣ муайян карда шуд, ки ҳодисаи мазкурро ронандаи мошини тамғаи «КАМАЗ» Хушбахт Меликови 26- сола содир намудааст.   Ҳамчунин дар ноҳияи Шаҳритус мошинаи тамғаи номаълум ҳангоми ҳаракат аз самти деҳаи Қаҳрамон ба самти деҳаи Бирляш дар ҳудуди деҳаи Чинор велосипедрон Равшан Муъминови 52- соларо зер намуда, аз ҷои ҳодиса ғайб мезанад, ки дар натиҷа велосипедрон ҷароҳати вазнини ҷисмонӣ бардошта, дар ҷои ҳодиса ба ҳалокат мерасад. Ҳангоми гузаронидани корҳои фаврию ҷустуҷӯӣ ронандаи мошинаи тамғаи «ВАЗ-21099» Рӯзибой Эшдавлатов, ки ҳодисаи мазкурро содир намудааст, боздошт шуд, Ба иттилои шуъбаи ташвиқоту тарғиботи Раёсати Бозрасии давлатии автомобилии Вазорати корҳои дохилии ҶТ Маҳмадшариф Шамсов ҳафтаи равон дар роҳҳои мошингарди ҷумҳурӣ 14 садамаи роҳу нақлиётӣ ба қайд гирифта шудааст, ки бар асари онҳо 6 нафар ба ҳалокат расида, 14 нафари дигар бо ҷароҳатҳои гуногуни ҷисмонӣ дар беморхонаҳо бистарӣ гардидаанд.