Густариши ҳамкории ҲХДТ бо Ҳизби коммунистии Чин

Душанбе, 22 апрел. (АМИТ «Ховар», Баҳманёр Муродов).-Хуан Хуагуан – сардори Департаменти тадқиқотии назди шуъбаи муносибатҳои байналмилалии Ҳизби коммунистии Чин ва Сафири ин кишвар дар Тоҷикистон Фан Сянжун бо муовини якуми раиси ҲХДТ Сафар Сафаров мулоқот анҷом доданд. Бар пояи иттилои сомонаи расмии ҲХДТ Сафар Сафаров оид ба фаъолияти ҲХДТ ва барномаҳои ҳизбӣ маълумот дода, аз ҳамкорӣ миёни Ҳизби Коммунистии Хитой ва Ҳизби Халқии Демократии Тоҷикистон изҳори қаноатмандӣ намуд. Ҳамзамон вобаста ба амалишавии якчанд лоиҳаҳои инвеститсионӣ, ки онро ширкатҳои чинӣ ба зимма доранд, ибрози назар шуд.Хуан Хуагуан – сардори Департаменти тадқиқотии назди шуъбаи муносибатҳои байналмилалии Ҳизби Коммунистии Чин аз муносибатҳои дуҷонибаи Тоҷикистону Ҷумҳурии мардумии Чин ҳарф зада, қаноатмандии ҳайаташро аз боздиди Ҷумҳурии Тоҷикистон изҳор дошт. Ҳамчунин зимни мулоқот ҷонибҳо вобаста ба масоили марбутаи ҳамкорӣ ва густариши муносибатҳои дутарафа суҳбат намуданд. Ба иттилои манбаъ ҳайати Ҳизби Коммунистии Чин бо роҳбарии Хуан Хуагуан – сардори Департаменти тадқиқотии назди шуъбаи муносибатҳои байналмилалии ин ҳизб тайи ду рӯз аст, ки дар Ҷумҳурии Тоҷикистон қарор дорад. .