«Хаёти шахсони наҷиб»

Душанбе, 12 апрел. (АМИТ «Ховар», Раъно Нусратуллоева).- Имрӯз дар Китобхонаи миллии Тоҷикистон бо ибтикори Донишгоҳи давлатии тиббии Тоҷикистон ба номи Абӯалӣ ибни Сино маҳфили илмию амалӣ зери унвони «Хаёти шахсони наҷиб» баргузор гардид. Чорабинӣ ба ҳаёт ва фаъолияти профессори варзидаи донишгоҳ Муаззама Мироқилова бахшида шуд. Профессор Муаззама Мироқилова соли 1959 факултаи муолиҷавии Донишкадаи тиббиро хатм намудааст. Ӯ фаъолияти меҳнатиашро аз ординатори клиникаи кафедраи бемориҳои кӯдакона оғоз намуда, ҳоло профессори ифтихории кафедраи бемориҳои кӯдаконаи Донишгоҳи давлатии тиббии ба номи Абӯалӣ ибни Сино мебошад.Тадқиқоти илмиаш ба масъалаи омӯзиши камхунӣ ва ҳолати гемопоэз дар кӯдакони сокини пасткуҳҳо, миёнакуҳҳо ва баландкуҳҳо, самарабахшии муолиҷаи иқлимии кӯдакони гирифтори зиққи нафас дар шароити миёнакуҳ бахшида шуда, муаллифи 130 таълифоти илмӣ мебошад. Дар доираи чорабинии мазкур китобҳои муаллиф ва асарҳои соҳаи педиатрӣ ба тамошо гузошта шуданд.