«Модерн» намудани мактаббачагон дар пойтахт

Душанбе, 16 апрел. (АМИТ «Ховар», Руқияи Боймамад).- Имрӯз дар бинои Маркази равобити пойтахт Форуми мактаббачагони шаҳри Душанбе оид ба технологияи иттилоотӣ ва комуникатсионӣ баргузор гардид.  Форуми мазкур бо мақсади баланд бардоштани сатҳи фарханги техникӣ, маданияти иттилоотии интернетӣ, оммафаҳмии технологияи иттилоотӣ, тарғиби имкониятҳои шабакаи Интернет дар рушди сатҳи донишу дараҷаи ҷаҳонбинии наврасон ва ҷавонон гузаронида мешавад. Дар форум Фарҳод Худоёров, муовини сардори раёсати маорифи шаҳри Душанбе гуфт: «Ин гуна форумҳо метавонанд барои баланд бардоштани сатҳи ҷаҳонбинии наврасон оид ба технологияи замонавӣ ва азхудкунии барномаҳои компютерӣ мусоидат намоянд. Форум аз тарафи Маркази ТИК-и назди Раёсати маорифи шаҳри Душанбе таҳти сарпарастии кулли ширкати «Телеком технолоҷи» дар шарикӣ бо Раёсати ҷавонон, варзиш ва сайёҳии шақри Душанбе ва Маркази кӯдакон ва наврасони шаҳри Душанбе баргузор гашт. Асомиддин Шералиев, муовини директори муассисаи давлатии ТИК-и шаҳри Душанбе гуфт: «Ҳадаф аз баргузории ин форум баланд бардоштани сатҳи технологияи фарҳанги ҷавонон, гузариш ба низоми ҳукумати электронӣ, тайёр намудани мутахассисони ҷавон ва ҳамқадами замон будани давлати мо мебошад. Дар озмун 100 лоиҳа пешниҳод шуд, ки аз он 50- тояш баррасӣ шуда, ба 6 лоиҳаи бехтарин туҳфа супорида мешавад. Дар Форум олимону мутахассисони соҳаи технологияи иттилоотӣ ва коммуникатсионӣ, коршиносон ва намояндагони ВАО ширкат доштанд. Дар ҷамъбаси форум маҷмӯаи корҳои анҷомдодаи иштирокчиён нашр мешавад. Форуми наврасон бахшида ба Рӯзи пойтахт баргузор гардида, 17 апрел беҳтарин корҳои толибилмон дар маркази равобити пойтахт қадрдонӣ мешаванд.