«Муъҷизаофарин»

Душанбе, 27 апрел. (АМИТ «Ховар», Раъно Нусратуллоева). Бо ибтикори Бунёди адабии Садриддин Айнӣ таҳти роҳбарии Эраҷ Айнӣ ба наздикӣ «Ашъори мунтахаб»-и шоири шаҳири тоҷик Лоиқ Шералӣ аз тариқи нашриёти Мега Басими Ҷумҳурии Туркия аз чоп баромад. Бино ба иттилои сармутахассиси Вазорати фарҳанги ҷумҳурӣ Раҳматулло Раҳматуллоев дар китоб зиёда аз 500 ғазалу қитъа, рубоиву дубайтиҳои шоир гирд оварда шудааст. Аз ҷониби мураттиби китоби мазкур Ниёзбадал Маликов сарсухани пурмуҳтавое таҳти унвони «Муъҷизаофарин» дар китоб ҷойгузин гардидааст, ки маълумоти муфассалеро доир ба паҳлуҳои гуногуни ашъори шодравон Лоиқ Шералӣ дар худ таҷассум менамояд. Дар тафовут бо дигар маҷмӯаҳои ашъори шоир, ки қаблан аз ин интишор гардидаанд, дар нашрияи навин ашъори шоир ба даҳ боб ҷудо шудааст, ки ҳар боб ба мавзӯи мушаххасе бахшида шудааст. Дар китоб беҳтарин ашъори шоир гулчин гардидаанд, ки табъи ҳар як хонандаро бо мазмуни баланду лафзи ширин болида месозад.
Намоиши китоби мазкур 27 апрели соли равон дар Арт галереяи Мино баргузор мегардад