Мулоқоти иттилоотӣ оид ба лоиҳаи CASA-1000

Душанбе, 27 апрел. (АМИТ «Ховар», Дилшодаи Хайруллоҳ).- Дирӯз дар Вазорати энергетика ва саноати Ҷумҳурии Тоҷикистон бо иштироки намояндагони ҷамъияти шаҳрвандӣ мулоқоти иттилоотӣ оид ба муҳокимаи лоиҳаи рушди интиқоли нерӯи барқ дар Осиёи Маркази ва Осиёи Ҷанубӣ CASA-1000 баргузор гардид. Дар ин чорабини намояндагони марказҳои таҳлилии мустақил, ассотсиатсияҳо, созмонҳои ҳуқуқии ғайриҳукуматӣ ва ғайра иштирок намуданд.Тавре маълум аст, мақсад аз лоиҳаи CASA -1000 ин таҳияи овардани механизми содироти нерӯи барқи зиёдатии дар фасли тобистон дар ҷумҳуриҳои Тоҷикистон ва Қирғизистон мавҷудбуда ба Афғонистон ва Покистон иборат мебошад. Ин лоиҳа барои табодули тақрибан 1000-1300 МВт нерӯи барқ дар минтақа имкон медиҳад. Ёдовар мешавем, ки масъалагузории омодасозии лоиҳа бо Асосноккунии техникию иқтисодӣ ҳануз соли 2007 шуруъ шуда, аммо таҳияи воқеии он соли 2011 оғоз гардид. Он бо иштироки Бонки ҷаҳонӣ такмил дода шуда сентябри ҳамон сол ҷаласаи аввали Шӯрои байниҳукуматӣ дар шаҳри Бишкек баргузор гардид. Айни замон, АТИ омода гардида, ҳамчунин омӯзишҳои зиёде мисли таъсир ба муҳити зист, таҳияи барномаи хизматрасонии иловагӣ барои аҳолӣ дар самти хатгузари нерӯи барқ, баҳодиҳӣ ва барномаи таъминоти бехатарии сохтмони хати нерӯи барқ ва ғайра амалӣ гардидааст. Вобаста ба лоиҳа Котиботи Шурои байниҳукуматӣ вуҷуд дошта, гуруҳҳои кории кишварҳо ҷиҳати баррасии масъалаҳои марбут ба лоиҳа тибқи нақшаҳо мулоқотҳо анҷом медиҳанд.Дар ин бора ба мухбири АМИТ «Ховар» аз котиботи вазорати энергетика ва саноати Ҷумҳурии Тоҷикистон иттилоъ доданд.