Мулоқоти Шариф Саид

Душанбе, 24 апрел. (АМИТ «Ховар», Покиза Маҳмадбекова). – Раиси Палатаи савдо ва саноати Тоҷикистон Шариф Саид дар ҳошияи иштирок дар Конгресси 8 – уми умумиҷаҳонии палатаҳои савдо дар шаҳри Давҳаи Шоҳигарии Қатар як қатор мулоқот анҷом дода, аз ҷумла, бо Дабири кулли Палатаи ҷаҳонӣ Жан –Ги Карре сӯҳбат намуд. Тавре ки аз Палатаи савдо ва саноати ҷумҳурӣ ба АМИТ «Ховар» хабар доданд, дар ҷараёни мулоқот мавзӯи конгресс, масоили мубрами рушди соҳибкорӣ дар вазъияти бӯҳрони ҷаҳонӣ, густариши соҳибкории хурду миёна дар Тоҷикистон ва тағйирот ба қонунгузорӣ мавриди муҳокима қарор гирифт. Жан – Ги Карре зикр намуд, ки ба Созмони умумиҷаҳонии савдо ворид шудани Тоҷикистон дастоварди муҳиме дар амри ҷалби сармояҳо ва дохил шудан ба низоми савдои ҷаҳонӣ ба шумор меравад. Ҷонибҳо аз рӯи натиҷаи мулоқот табодули ҳуҷҷатҳои иттилоотӣ намуданд. Дар ҷараёни мулоқоти Шариф Саид бо раиси Федератсияи умумиҷаҳонии палатаҳои савдо Рон Иракли мақоми Палатаи савдо ва саноати Тоҷикистон дар рушди соҳибкории хурду миёна зикр гардид.Шариф Саид ҳамчунин бо президенти Палатаи савдои Украина Г. Чижиков сӯҳбат намуд. Ҷонибҳо масоили ҳамкории дуҷониба ва имконияти доир намудани намоишгоҳи миллии Украина дар Тоҷикистонро мавриди муҳокима қарор доданд.