Намоишгоҳи «Маорифи Русия дар Душанбе»

Душанбе, 1 апрел. (АМИТ «Ховар», Фарзона Достонзода). – Аз 4 то 6 апрел дар Маркази илму фарҳанги Русия воқеъ дар шаҳри Душанбе ярмаркаи дуюми байналмилалӣ таҳти унвони «Маорифи Русия. Душанбе 2013» баргузор мегардад. Тавре ки аз Намояндагии Созмони ҳамкории Русия дар Тоҷикистон ба АМИТ «Ховар» хабар доданд, 4 апрел маросими ифтитоҳи намоишгоҳ – ярмарка ва мизи мудаввар дар мавзӯи «Таҳсилотии олии Русия: шароиту имкониятҳои нав» бо иштироки кормандони масъули бахши маорифи ҷумҳурӣ ва намояндагони донишкадаҳои олии Русия доир мешавад. Дар ин маросим масоили марбут ба технологияҳои нави маориф, ҳамчунин масъалаҳои омодагии довталабон барои дохил шудан ба донишкадаҳои олии Русия, проблемаҳои тадрис ва такмили ихтисос мавриди муҳокима қарор мегиранд.Барои муштариёни намоишгоҳ имконияти роҳандозии муколама бо намояндагони Сафорати Русия дар Тоҷикистон ва бархӯрдор шудан аз машваратҳои муфид дар мавриди ба расмият даровардани ҳуҷҷатҳо ҷиҳати дохил шудан ба донишкадаҳо фароҳам оварда мешавад.