“Парасту – 2013” ба Душанбе меояд

Душанбе, 4 апрел.(АМИТ «Ховар»,Фарзона Достонзода).-Фестивал-озмуни ҷумҳуриявии “Парасту — 2013” миёни театрҳои касбии Тоҷикистон аз 5-уми апрел дар шаҳри Душанбе оғоз мегардад.Тавре ки ба АМИТ «Ховар» аз дафтари матбуоти Вазорати фарҳанг хабар доданд, дар озмун ҳунармандони 15 театри ватанӣ, аз ҷумла Театри давлатии академӣ-драмавии ба номи Абулқосим Лоҳутӣ бо намоиши “Чархи гардон”-и Нур Табаров, Театри мусиқӣ-мазҳакавии ба номи Ато Муҳаммадҷонови шаҳри Қӯрғонтеппа бо намоиши “Лаку Пак”, Театри драмаи русии ба номи Александр Пушкини шаҳри Чкалов бо намоиши “Лӯлиён”, Театри мусиқӣ-мазҳакавии ба номи Меҳрубон Назарови шаҳри Хоруғ бо намоиши «Шатҳ» ва дигар театрҳо бо намоишҳои худ ҳунарнамоӣ менамоянд.Фестивал то 10-уми апрел идома ёфта, ҷамъбаст ва муайян намудани ғолибони он дар Театри опера ва балети ба номи Садриддин Айнӣ доир мешавад.