Р.Масов ҷоизи «Ситораи Иттиҳод»

Маскав, 22 апрел. (АМИТ «Ховар», Ҳалима Хушқадамова). – 25 апрел дар хонаи Пашкови Китобхонаи давлатии Русия маросими чоруми ботантанаи супурдани Мукофоти байнидавлатии ИДМ «Ситораи Иттиҳод» баргузор мегардад. «Ситораи Иттиҳод» ҳар сол дар соҳаи илму маориф, фарҳангу санъат ва фаъолияти башардӯстона барои саҳми бузург ва дастовардҳои мутобиқ ба сатҳи ҷаҳонӣ супурда шуда ва ба ҳамкории башардӯстонаи давлатҳои аъзои ИДМ мусоидат мекунад. Олими намоёни тоҷик, директори Институти таърих, бостоншиносӣ ва этнографияи ба номи Аҳмади Дониши Академияи илмҳои Ҷумҳурии Тоҷикистон, академик Раҳим Масов ҷоизи ин мукофоти мӯътабар дар соҳаи илму маориф дар соли 2012 гардид. Мукофоти байнидавлатии ИДМ «Ситораи Иттиҳод» — ро Шӯрои ҳамкории башардӯстонаи давлатҳои аъзои ИДМ ва Бунёди байнидавлатии ҳамкории башардӯстонаи давлатҳои аъзои ИДМ 21 майи соли 2009 дар ҷаласаи муштарак дар шаҳри Остонаи Қазоқистон таъсис дода буд. Арзиши мукофот 2 миллион рубли русиягиро ташкил медиҳад.