Роҳбари ИИ “Насоҷии Тоҷик”—беҳтарин соҳибкори Душанбе

Душанбе, 22 апрел. (АМИТ «Ховар». Баҳманёр Муродов).-Бо қарори раиси шаҳри Душанбе озмуни “Соҳибкори беҳтарини шаҳри Душанбе” ҷамъбаст гардида, соҳибкороне чун Наврӯз Комилов, Тамара Холиқова, Фарҳод Мирзоев, Зафар Қобилов, Абдушафеъ Ҳоҷиев, Хушмаҳмад Ҷомаҳмадов ва чандин нафари дигар дар бахшҳои гуногун ҳамчун беҳтарин соҳибкорони пойтахт дониста шуданд. Ҳамчунин бино ба иттилои сомонаи расмии мақомоти иҷроияи маҳаллии ҳокимияти давлатӣ дар Душанбе пешсафи соҳибкорони беҳтарини шаҳри Душанбе дар соли 2012 ғолиби бахши «Истеҳсоли маҳсулоти истифодаи саноат» директори генералии Ҷамъияти дорои масъулияти маҳдуди Иттиҳодияи истеҳсолии «Нассоҷии Тоҷик» Хушмаҳмад Ҷомаҳмадов интихоб шудааст. Гуфта мешавад озмун ҷиҳати баланд бардоштани нуфузи соҳибкорон дар ҷомеа, таблиғи дастовардҳои бунёдкоронаву созандаи онҳо, дастгирии ҳамаҷониба ва ҳавасмандгардонӣ бо мақсади рушди минбаъдаи соҳибкорӣ дар шаҳри Душанбе гузаронида шуд.