Сӯхтор дар бозори «Фаровон»

Душанбе, 25 апрел. (АМИТ «Ховар», Лутфия Эшонкулова).- Дирӯз тахминан соати 18-и бегоҳӣ дар бозори «Фаровон»-и шаҳри Қурғонтеппа сӯхтор ба амал омад, ки дар натиҷа он 25-30 фоизи бозорро фаро гирифт.Тавре ки сомонаи расмии ВКД хабар медиҳад, барои хомӯш намудани алангаи оташ тамоми қувваи мақомоти корҳои дохилӣ, Кумитаи ҳолатҳои фавқулодда, Кумитаи давлатии амнияти миллӣ ва дигар сохторҳои ҳукуматӣ сафарбар гардид.Аз ҷумла, 11 мошини сӯхторхомӯшкунӣ, 2 мошини обкашонӣ ва 3 мошини ёрии таъҷилӣ сафарбар шуда, дар давоми 1,5 соат пеши роҳи паҳншавии оташ гирифта ва он хомӯш карда шуд.Сӯхтор дар яке аз мағозаҳои фурӯши бозичаҳои кӯдакона сар зада, тахмин меравад, ки аз ҳисоби расиши ноқилҳои барқӣ ба вуҷуд омадааст.Барои муайян намудани сабаби асосии сӯхтор аз ҳисоби кормандони ботаҷрибаи мақомоти корҳои дохилӣ, прокуратура, кумитаҳои амнияти миллӣ ва ҳолатҳои фавқулодда гуруҳи корӣ таъсис дода, санҷиши пешакӣ оғоз шуда, инчунин лабораторияи Сарраёсати хадамоти давлатии оташнишонии ВКД ба ҷои ҳодиса сафарбар карда шудааст.Талафоти ҷонӣ нест.