«Садои Шарқ» соҳиби сомона мешавад

Душанбе, 25 апрел. (АМИТ «Ховар», Баҳманёр Муродов).-Аъзои Раёсат ва шӯроҳои Иттифоқи нависандагони Тоҷикистон фаъолияти яксолаи маҷаллаи «Садои Шарқ» -ро дар соли 2012-юм баррасӣ намуданд.Ҷаласаро Раиси ИН Меҳмон Бахтӣ ҳусни оғоз бахшида, баъдан Абдулҳамид Самад, Худоӣ Шарифзода, Рустами Ваҳҳоб, Боймурод Шарифзода, Саидаҳмади Зардон ва дигарон осори дар соли гузашта дар маҷалла нашршударо муҳокима карда, андешаҳояшонро ба миён гузоштанд. Зикр гардид, ки фаъолияти маҷалла дар соли 2012-ум дар маҷмуъ хуб буд.Иттилоъ дода шуд, ки ба наздикӣ сомонаи расмии маҷаллаи «Садои Шарқ» роҳандозӣ мешавад ва ҳамчунин шумораҳои ҳар як соли маҷалла ба сурати диски алоҳида ба хонандагон пешниҳод мегардад.