Соҳибкорони тоҷик ба ҳамватани худ дасти кӯмак дароз карданд

Душанбе, 1 апрел. (АМИТ «Ховар», Ибодат Давлатова).-Ба Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия муҳоҷири меҳнатӣ- шаҳрванди ҶТ, сокини шаҳри Қӯрғонтеппа, Рустам Наҷмуддинов, соли таввалудаш 1979 муроҷиат намуда, хоҳиш кард, ки бинобар надоштани имконияти молиявӣ ва бад будани вазъи саломатиаш ӯро ба ватан фиристонанд.Тавре ки ба мухбири АМИТ «Ховар» аз Хадамоти муҳоҷират иттилоъ доданд, зимни суҳбат бо муҳоҷир муайян шуд, ки ӯ на танҳо маблағи кофӣ барои харидории чиптаро надорад, балки ҳуҷҷатҳои тасдиқкунандаи шахсияташро низ гум кардааст. Бояд гуфт, ки бо мусоидати Хадамоти консулгарии Тоҷикистон дар вилояти Свердловск барои Рустам Наҷмуддинов ҳуҷҷат барои бозгашт ба Ватан омода гардид. Соҳибкорони тоҷик низ ба ҳамватани худ дасти кӯмак дароз карданд. Бо дастгирии молиявии онҳо маблағи чиптаи ҳавопаймо ҷамъ оварда шуда, 27 март муҳоҷир тавассути ҳавопаймои хатсайри Кӯлоб-Екатеринбург ба ватан равон карда шуд, хабар дод манбаъ.