Туҳфа ба ғолибони пойга

Душанбе, 17 апрел. (АМИТ «Ховар», Дилшодаи Хайруллоҳ).- Дар доираи баргузории аксияи «Насли созанда» бо дастгирии Кумитаи иҷроияи вилоятӣ ва ташаббуси Ташкилоти ҷамъиятии ҷавонон -«Созандагони Ватан» дар вилояти Суғд шанбегии умумивилоятӣ баргузор гардид.  Бино ба иттилои масъулин дар маркази вилоят 8700 нафар ва дар маҷмуъ дар миқёси вилоят 28300 нафар ба шанбегӣ баромаданд, ки далели ҷонибдории аҳли ҷомеа аз иқдоми ватандӯстонаи ҲХДТ ва «Созандагони Ватан» мебошад. Хусусан, хонандагони мактабҳо, донишҷӯёни мактабҳои олию миёнаи махсус, кумитаи маҳаллаҳо, аъзои ташкилотҳои ибтидоӣ, коргарони ташкилоту муассисаҳо ва хоҷагиҳои истифодабарии манзил хеле фаъол буданд. Инчунин чорабинии варзишии пойга, ки дар давоми чандин сол маротибаи нахустин доир гардид, ба муттаҳиду сарҷамъ шудани теъдоди зиёди варзишгарони ҷавон ва мухлисони ин намуди варзиш мусоидат намуд. Пойга аз назди гардишгоҳи биноҳои асосии таълимии ДДХ ва ДДҲБСТ оғоз ёфта, дар варзишгоҳи картингронӣ, воқеъ дар маҳаллаи 13-уми шаҳри Хуҷанд ба охир расид ва дар ҷамъбасти мусобиқа ба ғолибону иштирокчиёни фаъол туҳфаҳои хотиравӣ супорида шуд. Дар ин бора Адҳам Мирсаидов, раиси ТҶҶ «Созандагони Ватан» иттилоъ дод.