Вохӯрии аъзои ҲХДТ бо Ҳақназар Ғоиб

Душанбе, 15 апрел. (АМИТ «Ховар», Баҳманёр Муродов).- Бо ташаббуси ташкилоти ибтидоии «Олимон»-и назди Кумитаи иҷроияи Ҳизби Халқии Демократии Тоҷикистон дар Кӯлоб вохӯрии Шоири халқии Тоҷикистон, узви ҲХДТ Ҳақназар Ғоиб бо ҳизбиёни шаҳр баргузор гардид. Бино ба иттилои сомонаи расмии ҲХДТ маҳфил ба 50-солагии фаъолияти эҷодии ин шоири маъруф бахшида шуда, дар он раиси Кумитаи иҷроияи ҲХДТ дар шаҳри Кӯлоб Зулайхо Ҳақназарова, раиси ташкилоти ибтидоии «Олимон»-и ҳизб, ректори Донишгоҳи давлатии Кӯлоб Абдулло Табаров, шоираи шинохта Хосият Вализода ва дигар шахсиятҳои варзидаи ҳизбӣ иштирок намуданд. Ҳақназар Ғоиб аз дастовардҳои кишвари соҳибистиқлоли Тоҷикистон ёдовар шуда, зикр намуд, ки рушду пешрафти кишвар манбаи илҳоми шоирон аст. Ҳамчунин дар анҷоми маҳфил суҳбати озоди ҳизбиёни Кӯлоб бо шоир Ҳақназар Ғоиб сурат гирифт.