Ёрӣ ба муҳоҷирони меҳнатӣ

Душанбе, 24 апрел. (АМИТ «Ховар», Ибодат Давлатова).-Мақомоти иҷроияи ҳокимияти давлатии вилояти Суғд аз оғози соли равон баррасии муроҷиати шаҳрвандонро бо усули «Равзанаи ягона» ба роҳ мондааст. Чанде пеш бо ҳамин тарз рӯзи қабули шаҳрвандон дар шаҳри Панҷакент ба роҳ монда шуд, ки дар он сардори Раёсати Хадамоти муҳоҷират дар вилояти Суғд Зайнура Шарифова низ иштирок кард. Рӯзи қабули шаҳрвандон аз ҷониби раиси вилояти Суғд 3 рӯз давом кард. Рӯзи аввал дар ҷамоати Косатарош, рӯзи дуюм дар ҷамоати Ёрӣ ва рӯзи сеюм дар худи шаҳри Панҷакент муроҷиати зиёда аз 200 нафар шаҳрванд, ки намояндаи сокинони 14 ҷамоати шаҳраку деҳот буданд, шунида шуд. Муроҷиати 5 нафар сокини ҷамоати деҳоти Ёрӣ вобаста ба масъалаҳои муҳоҷирати меҳнатӣ, аз ҷумла ба воситаи субъектҳои хоҷагидор сафарбар намудан ба муҳоҷират, мусоидат ба гирифтани музди меҳнат дар шаҳри Маскав буд. Сардори Раёсат дар баробари баррасии муроҷиати онҳо бо як гуруҳ муҳоҷирони меҳнатии ба Ватан баргашта ва аҳли оилаи онҳо оид ба муҳоҷирати бехатар, қоидаҳои будубош дар хориҷа ва сарфи мақсадноки маблағҳо суҳбат кард. Дар ин бора ба мухбири АМИТ «Ховар» аз шуъбаи робита бо ҷомеаи ХМ назди Ҳукумати Ҷумҳурии Тоҷикистон хабар доданд.