Баррасии мушкилоти забони русӣ дар Донишгоҳи омӯзгорӣ

Душанбе, 15 май. (АМИТ «Ховар», Раъно Нусратуллоева).-Бо ташаббуси факултаи забон ва адабиёти руси Донишгоҳи давлатии омӯзгории Тоҷикистон ба номи С.Айнӣ 14-уми майи соли ҷорӣ конфронсияи илмию амалӣ дар мавзӯи «Мушкилоти омӯзиши забони русӣ дар шароити низоми кредитӣ» доир гардид, ки дар он меҳмонон аз дигар макотиби олии мамлакат ширкат варзиданд. Тибқи барнома дар конфронс маърӯзаҳои сершумор, аз ҷумла, «Ташаккул ёфтани асосҳои омӯзиши ду забон-тоҷикӣ ва русӣ», «Омӯзиши дурусти забони русӣ дар дарсҳои амалӣ бо донишҷӯёни туркман» ва «Омӯзиши методҳои инноватсионӣ дар Ҷумҳурии Тоҷикистон» шунида шуданд. Зикр шуд, ки барои омӯзиши забони русӣ фақат назария кофӣ нест, чунки усулҳои нави омӯзиш бояд ба кор бурда шаванд. Иртибот байни фарҳанг ва омӯзиши фарҳангҳо бояд дар амал татбиқ гардад. Ҳамзамон таъкид шуд, ки роҳандозии услуби дурусти назария ва амалияи омўзиши забони русӣ ва ҳамчунин истифодаи инноватсияи педагогӣ аз ҷумлаи мушкилоти бузург дар ин самт ба шумор меравад.Дар ин бора ба хабарнигори АМИТ «Ховар» котиби матбуотии донишгоҳ Бахтиёри Абдураҳим иттилоъ дод.