Боз як фаввораи мусиқиафзо дар пойтахт

Душанбе, 21 май.(АМИТ «Ховар», Марзия Саидова).-Фаввораи Майдони 800-солагии Маскав, ки дар пешорӯйи бинои Театри давлатии академии опера ва балети ба номи С. Айнӣ воқест, таъмиру таҷдид гардида, намои замонавӣ мегирад. Маҳмадӣ Саъдуллоев –сардори шуъбаи назорати техникӣ оид ба сохтмони иншооти соҳаи манзил ва дигар сохтмони Раёсати сохтмони асосии шаҳри Душанбе дар суҳбат ба хабарнигори АМИТ «Ховар» гуфт, ки корҳои таъмиру таҷдид дар ин иншоот муддати чор моҳ идома ёфта, интизор меравад то моҳи сентябри соли равон ба анҷом расад. Раёсати сохтмони асосии шаҳри Душанбе фармоишгар ва ҶДММ «Евро-стандарт-строй» паймонкори лоиҳаи мазкур буда, алҳол корҳои таъмиру таҷдид дар он ҷараён доранд. Баъди таҷдиди фавора он ба худ намои муосир касб намуда, об таҳти навои мусиқӣ фаввора мезанад. Ҳамзамон баъди анҷоми корҳои таъмиру таҷдид дар ин иншоот дигар дар атрофи фаввора нуқтаҳои фурӯши таомҳои гуногуну нӯшокиҳо, ки қаблан фаъолият дошт, аз байн бурда мешаванд. Ин мавзеи зебои як гӯшаи Душанбе танҳо барои сайругашт ва тафреҳи сокинону меҳмони пойтахт пешбинӣ мешавад. Мавриди зикр аст, ки фаввораи назди бинои Театри давлатии академии опера ва балети ба номи С. Айнӣ 66 сол муқаддам, аниқтараш соли 1947сохта шудааст. Худи лоиҳаи сохтмони бинои театри мазкур охири солҳоли 30-юм аз ҷониби меъморон Н. Билибин, В.Д.Голли ва А.А Юнгер таҳия гардида, сохтмонаш соли 1939 оғоз ёфтааст. Сохтмони ин бино дар замони барои собиқ мардумони Иттиҳоди Шуравӣ мушкил, яъне солҳои Ҷанги Бузурги Ватанӣ идома ёфта, дар соли 1946 ба анҷом расидааст. Бинои мазкур иншооти муҳташами санъати меъмории Тоҷикистон маҳсуб мешавад.