Боз як салоҳият ба Прокурори генералӣ вогузор шуд

Душанбе, 24 май.(АМИТ «Ховар», Марзия Саидова).-Вакилони палатаи поёнии Парлумони Тоҷикистон ба қисми 11-и моддаи 31-и лоиҳаи Қонуни Ҷумҳурии Тоҷикистон «Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон» тағйирот ворид намуданд. Тибқи ин тағйирот минбаъд парвандаи ҷиноятиро нисбат ба кормандони мақомоти Агентӣ оид ба ҷиноятҳои коррупсионӣ, иқтисодии хусусияти корупсионӣ дошта ва ҷиноятҳои марбут ба андозро директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва Прокурори генералии Ҷумҳурии Тоҷикистон оғоз менамоянд. Қаблан ин масъулиятро суд ба уҳда дошт.  Миллопар Бандишоев-муовини директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон, ки лоиҳаи қонуни мазкурро дар назди вакилон шарҳ медод гуфт: ин тадбир бо мақсади ба миён наомадани низоъҳо ва бартараф намудани бархӯрди манфиатҳои идоравӣ, инчунин дар амал татбиқ намудани сиёсати зиддикоррупсионии роҳбарияти олии кишвар андешида шудааст. Шерхон Салимзода –Прокурори генералии ҷумҳурӣ, ки қаблан роҳбарияти Агентии назорати давлатии молиявӣ ва мубориза бо коррупсияро ба уҳда дошт, доир ба ворид намудани тағйирот ба лоиҳаи қонуни мазкур ибрози назар кард. Мавсуф афзуд, ки ворид намудани тағйирот ба лоиҳаи ин қонун ҷиҳати пешгирии содиркунии амалҳои сӯйистеъмолии мансаб ва дигар омилҳои коррупсионӣ ва баланд бардоштани масъулияти кормандони Агентии назорати давлатии молиявӣ ва мубориза бо коррупсия мусоидат менамояд. Қонуни Ҷумҳурии Тоҷикистон «Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон» соли 2007 таҳия ва қабул гардида, он фаъолияти ин мақомотро дар кишвар ба танзим медарорад.