Хонандагон соҳиби касб мегарданд

Кӯлоб, 3 май. (АМИТ «Ховар», С.Холов). – Тибқи дастуру супоришҳои Президенти ҶТ Эмомалӣ Раҳмон ва Вазорати маориф роҳбарияти литсеи касбию техникии рақами 16 – и ноҳияи Восеъ баҳри баланд бардоштани сифати таълим, омода намудани кадрҳои баландихтисоси рақобатпазир дар бозори меҳнат, такмили корҳои таълимӣ ва дигар равандҳои соҳаи таҳсилоти касбӣ барномаи махсуси корӣ таҳия намуданд. Бинобар иттилои директори литсей Абдуғаффор Одинаев дар соли хониши 2012 – 2013 зиёда аз 305 нафар хонанда дар гуруҳҳои рӯзона ва 194 нафар дар гуруҳи ғоибона ба омӯзиш фаро гирифта шуд, ки 70 нафарашро духтарон ташкил медиҳанд. Ба хонандагон ихтисосҳои кафшергарӣ, барқчӣ, дӯзандагӣ ва дигар касбҳои гуногун омӯзонида шуда, дар ин давра 21 нафар хонанда баъди хатми литсей ба мактабҳои олии кишвар дохил шуда, қисми дигари он бо диплом ва шаҳодатномаи тахассусӣ таъмин гардиданд. Мавриди зикр аст, ки дар раванди таҳсил ба хонандагон 36 нафар омӯзгорон ва устоҳои таълимӣ дарс гуфта, таҷриба меомӯзонанд.Соли сипаригардида 174 нафар литсеи касбию техникиро хатм карда, дар соҳаҳои гуногун фаъолият доранд.