Иттилоияи расмии Хадамоти муҳоҷират

Душанбе, 29 май. (АМИТ «Ховар»).- Хадамоти муҳоҷирати назди Ҳукумати Ҷумҳурии Тоҷикистон ба диққати тамоми шаҳрвандон-муҳоҷирони меҳнатии Ҷумҳурии Тоҷикистон мерасонад, ки бинобар надоштани равобит ва муносибатҳои дипломатӣ бо Абхазия шаҳрвандони Тоҷикистон ҳангоми гузаштан аз сарҳади Абхазия ва ворид шудан ба қаламрави Федератсияи Русия бо мушкилот рӯ ба рӯ мегарданд. Ба таври мисол метавон аз муроҷиати шаҳрванд Саидхуҷа Абдукаримов, сокини ноҳияи Рашт ба Хадамоти муҳоҷират ёдовар шуд, ки писараш чанд моҳ аст, ки дар Абхазия мебошад. Ӯ наметавонад вориди қаламрави ФР шавад. Ҷиҳати мусоидат ва кӯмак расонидан ба писари Саидхуҷа Абдукаримов бо раиси ҷамъияти тоҷикони шаҳри Сочи Фаррух Миров дар тамос шудем ва иброз доштанд, ки ба ӯ кӯмак расонида, мусоидати хешро дареғ нахоҳанд дошт. Аз ин лиҳоз, хоҳишмандем шаҳрвандони ҷумҳурӣ доир ба ин масъала таваҷҷуҳи ҷиддӣ зоҳир намоянд ва дар сурати пайдо шудани мушкилот ба телефонҳои боварии Хадамоти муҳоҷирати назди Ҳукумати Ҷумҳурии Тоҷикистон занг зананд.