Конфронси илмию амалӣ дар Қӯрғонтеппа

Душанбе, 6 май. (АМИТ «Ховар», Раъно Нусратуллоева).- Академияи таҳсилоти Тоҷикистон муштаракан бо Донишгоҳи давлатии Қӯрғонтеппа ба номи Носири Хусрав ва идораи маорифи вилояти Хатлон 7 май дар шаҳри Қӯрғонтеппа дар мавзӯи «Хонаводаи солим – гарави саломатӣ ва тарбия» конфронси илмию амалии ҷумҳуриявӣ доир менамояд. Тавре ки аз Академияи таҳсилоти Тоҷикистон иттилоъ доданд, дар ҷараёни конфронс силсилаи мавзуъҳои мавриди назар баррасӣ ва пешниҳодоти ҷолиб натиҷагирӣ хоҳанд шуд, ки ба татбиқи амалии Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» нигаронида шудаанд. Доир ба ин мавзӯъ маърӯзаҳои сардори идораи маорифи вилояти Хатлон Х. Қурбонзода, академики Академияи таҳсилоти Тоҷикистон Маҳмадулло Лутфуллоев, академики Академияи таҳсилоти Тоҷикистон Файзулло Шарифзода, доктори илми педагогӣ, профессор Сафар Сулаймонӣ, доктори илми педагогӣ, профессор Қ. Абдураҳмонов дар назар аст. Баргузоии ҳамин гуна чорабинӣ дар Донишгоҳи давлатии Хуҷанд ба номи Б. Ғафурови вилояти Суғд низ ба нақша гирифта шудааст.