Масъулияти судяҳо баланд бардошта шуд
Душанбе, 22 май.(АМИТ «Ховар», Марзия Саидова).-Палатаи поёнии Парлумони Тоҷикистон ба лоиҳаи Қонуни конститутсионии Ҷумҳурии Тоҷикистон «Дар бораи судҳои Ҷумҳурии Тоҷикистон» тағйирот ворид намуд. «Ҳадафи тағйирот ба лоиҳаи қонуни конститутсионӣ «Дар бораи судҳои Ҷумҳурии Тоҷикистон» фароҳам овардани шароит барои пешгирӣ ва мубориза бо коррупсия, баланд бардоштани масъулияти судяҳо дар иҷрои вазифаҳои хизматияшон мебошад», гуфт зимни тавзеҳи лоиҳаи қонуни конститутсионӣ Шерхон Салимзода –Прокурори генералии ҷумҳурӣ дар назди вакилони Парлумони мамлакат. Мавсуф зикр кард, ки ба моддаи 9-и лоиҳаи қонуни мазкур тағйиру иловаҳо ворид карда шудааст. Тибқи он парвандаҳои ҷиноятӣ ва маъмурӣ нисбат ба судяҳо танҳо аз ҷониби Прокурори генералӣ оғоз шуда, ин парвандаҳо танҳо аз тарафи Суди Олӣ баррасӣ мешаванд. Ба ҳамин монанд татбиқи чораҳои пешгирӣ дар намуди ҳабси пешакӣ ва ҳабси хонагӣ, гузаронидани дигар амалҳои тафтишотӣ нисбат ба судя, ки ҳуқуқу озодиҳои онро халалдор месозад, бо розигии Прокурори генералӣ ва иҷозати Суди Олӣ сурат мегирад. Инчунин қисмҳои 8-9-10 ва 11 аз моддаи 9-и қонуни мазкур хориҷ мешавад. Ин ба талаботи Конститутсия низ, ки ба судяҳо ҳуқуқи дахлнопазирӣ додааст, мутобиқат мекунад. Яъне дахлнопазирии судяҳо аз қонун пурра бардошта намешавад, афзуд Прокурори генералии ҷумҳурӣ. Ҳамзамон бо мақсади баланд бардоштани ҳисси масъулияти судяҳо ҳангоми иҷрои вазифаи хизматӣ ва роҳ надодан ба қонунвайронкуниҳо аз тарафи онҳо масъалаи ба ҷавобгарии интизомӣ кашидани онҳо низ ба талаботи қонунгузории ҷумҳурӣ мувофиқ кунонида мешавад. Аз ин рӯ қисмҳои 2 ва 3-и моддаи 119, ки асосҳои ба ҷавобгарии интизомӣ кашидани судяҳоро танзим мекунад, хориҷ карда мешавад. Қаблан дар ин модда гуфта мешуд, ки судяҳо барои бекор кардани ҳукм, ҳалнома ва дигар санадҳои судӣ ба ҷавобгарии интизомӣ кашида намешаванд, яъне масъулият надорад, ин аз байн бардошта мешавад, ки он масъулияти судяҳоро баланд мебардорад. Шерхон Салимзода зикр кард, ки лоиҳаи қонуни мазкур бо назардошти пешрафти ҷомеа саривақтӣ ва зарурӣ аст. Он аз ҷониби Ҳукумати Ҷумҳурии Тоҷикистон таҳия гардида, барои баррасӣ ба палатаи поёнии Парлумони Тоҷикистон ироа гардидааст.








Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд






