Мулоқоти Ҳ.Зарифӣ бо И.Шимонович

Душанбе, 23 май (АМИТ «Ховар»).- 22 майи соли 2013 вазири корҳои хориҷии Ҷумҳурии Тоҷикистон Ҳамрохон Зарифӣ Ёвари Дабири кулли Созмони Милали Муттаҳид оид ба масъалаҳои ҳуқуқи инсон Иван Шимоновичро ба ҳузур пазируфт. Зимни мулоқот ҷонибҳо масъалаҳои ҳамкории минбаъдаи Ҷумҳурии Тоҷикистон ва Идораи Комиссари олии СММ оид ба ҳуқуқи инсон, иҷрои тавсияҳои абзорҳои СММ роҷеъ ба ҳуқуқи инсон, тасвиби санадҳои байналмилалии ҳуқуқӣ дар соҳаи ҳуқуқи инсон, ислоҳоти низоми судӣ дар кишварро мавриди муҳокима қарор доданд. Ёвари Дабири кулли СММ ба сиёсати Тоҷикистон, ки ба рушди минбаъдаи демократия, волоияти қонун ва эҳтироми ҳуқуқи инсон ва озодиҳои бунёдӣ равона гардидааст, баҳои баланд дод. Вазири корҳои хориҷӣ ба И.Шимонович дар бораи пешниҳод гардидани номзадии Тоҷикистон ба узвияти Шӯрои ҳуқуқи инсони СММ барои солҳои 2015-2017 маълумот дод. Дар интиҳо ҷонибҳо ҳавасмандии худро ба идомаи ҳамкории шарикии самарабахш дар соҳаи ташвиқ ва ҳимояи ҳуқуқи инсон изҳор намуданд.