Шашмақомсароёни озарӣ ба Душанбе меоянд

Душанбе, 29 май (АМИТ «Ховар» Зарангези Латиф).-Пагоҳ, 30-юми майи соли равон дар толори консертии Донишкадаи санъати Тоҷикистон ба номи Мирзо Турсунзода бахшида ба 90 солагии пешвои халқи Озарбойҷон Ҳайдар Алиев маҳфили фарҳангӣ доир мегардад. Гуфта мешавад, ки дар он устодону ҳунармандони маъруфи Ҷумҳурии Озарбойҷон ширкат меварзанд Ҳамчунин дар назар дошта шудааст, ки Айтан Муҳаррамова, ғолиби Фестивали байналмилалии шашмақом дар соли 2011, Парвиз Фарҳодов, ғолиби 7-умин Фестивали байналмилалии “Садои АвруОсиё” дар соли 2012 ва дигар ғолибони озмунҳои ҷаҳонӣ дар ин маҳфил иштирок ва шашмақомхонӣ намоянд. Бояд гуфт , ки маҳфил дар доираи ҳамкориҳои Вазорати фарҳанги ду кишвар баргузор мегардад. Дар ин бора Тағоймурод Назаров, ноиби ректор оид ба корҳои эҷодию тарбиявии донишкада ба АМИТ «Ховар» иттилоъ дод.