Таҷлили 5 –умин солгарди Маркази ҳифзи ҳуқуқ

Душанбе, 29 май. (АМИТ «Ховар»). – Аз рӯзи таъсиси Созмони ҷамъиятии байниминтақавии «Маркази ҳифзи ҳуқуқи тоҷикистониён» дар вилояти Новосибирски Федератсияи Русия 5 сол сипарӣ шуд. Ба ин муносибат дар шаҳри Бердски вилояти Новосибирск маҷлиси ботантана баргузор гардид, ки дар он намояндагони маъмурияти шаҳру вилоят, Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия, созмонҳои ҷамъиятӣ, ВАО ва ҳамватанони мо ширкат доштанд. Назар ба хабари дафтари матбуоти Намояндагии Хадамоти муҳоҷирати ҶТ дар ФР роҳбари намояндагӣ Асрор Одинаев зимни суханрониаш зикр намуд, ки таҳкиму густариши ҳамкорӣ бо созмонҳои ҷамъиятии тоҷикон дар Русия яке аз самтҳои муҳими фаъолияти Хадамоти муҳоҷират маҳсуб меёбад. Роҳбари Созмони ҷамъиятии «Маркази ҳифзи ҳуқуқи тоҷикистониён» Исроил Шарифов дар навбати худ перомуни самтҳои асосии фаъолияти марказ нақл кард.