Таъмини мардум бо ҷойҳои нави кор

Душанбе, 2 май. (АМИТ «Ховар», Лутфия Эшонқулова). – Чанде пеш дар шаҳри Душанбе ҷаласаи сеюми Шӯрои ҷамъиятии Хадамоти муҳоҷирати назди Ҳукумати Ҷумҳурии Тоҷикистон баргузор гардид. Тавре ки аз дафтари матбуоти Хадамоти муҳоҷирати Тоҷикистон хабар доданд, дар ҷараёни ҷаласа вазъи ҳозираи муҳоҷирати меҳнатӣ, тадрису омӯзиши забонҳои хориҷӣ аз ҷониби муҳоҷирони меҳнатӣ, масоили механизми миллии ирсоли муҳоҷирони меҳнатӣ ва ғайра муҳокима шуданд.Зикр шуд, ки ҳар сол аз Ҷумҳурии Тоҷикистон беш аз 600 — 700 ҳазор нафар муҳоҷирони меҳнатӣ барои иҷрои корҳои муваққатӣ ба хориҷа мераванд.Афзоиши ҳарсолаи нуфуси Ҷумҳурии Тоҷикистон 2,0 ва 2,1 фоизро ташкил дода, бинобар ин бозори дохилии меҳнат ҳар сол асосан аз ҷумлаи ҷавонон баробари 150 – 180 ҳазор нафар пурра мегардад. Хотирнишон месозем, ки ҷамоаҳо ва марказу иттиҳодияҳои фарҳангии тоҷикон дар бисёр кишварҳои ҷаҳон, аз ҷумла, дар Русия фаъолият доранд.Иштирокдорони ҷаласа аз рӯи натиҷаи Шӯрои ҷамъиятӣ пешниҳод намуданд, ки Корхонаи воҳиди давлатии «Роҳи оҳани Тоҷикистон» ва қӯшунҳои сарҳадии Кумитаи давлатии амнияти миллии Ҷумҳурии Тоҷикистон ба узвияти Шӯрои ҷамъиятӣ дохил намуда ва дар ҷаласаҳои оянда ҳисоботу пешниҳодоти онҳо шунида шаванд.