Таъсиси марказҳои ҳамкории милитсия бо ҷомеа дар кишвар

Душанбе,16 май. (АМИТ «Ховар», Фарзонаи Давлат)-Имрӯз, сафири ИМА дар Тоҷикистон хонум Сюзан Эллиотт ва вазири корҳои дохилии Тоҷикистон генерал-лейтенанти милитсия Рамазон Раҳимов дар маросими ифтитоҳи расмии ду маркази ҳамкории милитсия бо ҷомеа ширкат варзиданд.  Марказҳои мазкур бо ташаббуси Вазорати корҳои дохилӣ (ВКД) баҳри густариши фаъолияти барномаи Сафорати ИМА «Ҳамкории милитсия бо ҷомеа», ки дар сатҳи ҷумхуриявӣ амалӣ мегарданд, таъсис ёфтаанд. Ҳадафи аслии барномаи мазкур такомул бахшидани имконоти хизматрасонии ВКД ба шаҳрвандон бо таъмини риояи ҳуқуқи инсон ва баланд бардоштани сатҳи боварии шаҳрвандон ба милитсия мебошад. Ёдрас мешавем, ки бо дастгирии Ҳукумати ИМА дар маҷмуъ 19 маркази ҳамкории милитсия бо ҷомеа дар нуҳ ноҳияи Тоҷикистон таъсис гардидааст. Ҳамчунин дар назар аст, ки моҳҳои наздик марказҳои иловагӣ таъсис хоҳанд ёфт. Марказҳои мазкур барои милитсия ва ҷомеа фазои амни воқеӣ ва рӯҳӣ фароҳам меоваранд, ки дар он ҷонибҳо ҳамкории хешро беҳтар намуда, роҳҳои ҳалли мушкилотро вобаста ба пешгирии ҷиноят, бенизомии ҷамъиятӣ, бехатарӣ ва сифати ҳаёт баррасӣ мекунанд. Ҳукумати ИМА дастгирии хешро дар самти такомул бахшидани имконоти мақомоти ҳифзи ҳуқуқи Ҷумҳурии Тоҷикистон идома хоҳад дод. Аз соли 1992 инҷониб Ҳукумати ИМА тавассути барномаҳо ва кӯмакҳои башардӯстона барои дастгирии мақомоти ҳифзи ҳуқуқ ва таъмини амният, рушди иқтисод, ниҳодҳои демократӣ, соҳаҳои тандурустӣ ва маорифи Чумҳурии Тоҷикистон маблағи беш аз як миллиард доллари ИМА-ро ҷудо намудааст.