Зайд Саидов дастгир шуд

Душанбе, 20 май. (АМИТ «Ховар»). – Дар Агентии назорати давлатии молия ва мубориза бо ришвагирии Ҷумҳурии Тоҷикистон парвандаи ҷиноӣ бо гумонбари собиқ вазири саноат ва энергетикаи Ҷумҳурии Тоҷикистон Зайд Саидов барои содир намудани як қатор ҷиноятҳои вазнин, аз ҷумла дар ҳаҷми калон гирифтани пора (қисми 4 моддаи 319), қаллобӣ бо истифода аз мансаб дар ҳаҷми хусусан калон (қисми 4 моддаи 247), суъистемол аз мансаб (моддаи 314) Кодекси ҷиноии Ҷумҳурии Тоҷикистон тафтиш карда мешавад. Назар ба хабари маркази матбуоти агентии мазкур, ин далелҳо дар ҷараёни тафтиши пешакии парвандаи ҷиноӣ нисбат ба собиқ намояндаи маҷлиси вакилони халқии вилояти Суғд, директори генералии Ҷамъияти саҳҳомии шакли кушодаи «Химзавод» — и шаҳри Исфараи зертобеъи Вазорати саноат ва энергетикаи Ҷумҳурии Тоҷикистон Низомхон Ҷӯраев ошкор гардиданд.Алҳол бо назардошти сирри тафтишот аз шарҳи васеи он худдорӣ намуда ва фақат зикр карда мешавад, ки тафтишот дар доираи қонуни амалкунандаи Ҷумҳурии Тоҷикистон гузаронида мешавад. Азбаски аксарияти шоҳидони воқеаҳо аз маҳалли истиқоматашон берун аз ҳудуди ҷумҳурӣ аз тафтишот пинҳон гардиданд, бо мақсади гузаронидани тафтишоти холисона ва пурраю беғаразона лозим дониста шуд, ки Зайд Саидов аз фурудгоҳ ба мақомоти Агентӣ даъват карда шавад.