Ҳамоиши муштараки Тоҷикистону Туркманистон

Душанбе, 11 июн.(АМИТ «Ховар», Марзия Саидова).-«Интизор меравад, ки соли равон ду кишвари Осиёи Марказӣ- Тоҷикистону Туркманистон, ки дорои робитаҳои устувори мутақобилан судманди иқтисодию тиҷоратианд Рӯзи ҷаҳонии туризмро ба таври муштарак таҷлил менамоянд», гуфт дар сӯҳбат ба хабарнигори АМИТ «Ховар» Чинор Рустамова-Сафири Фавқулодда ва Мухтори Туркманистон дар Ҷумҳурии Тоҷикистон. Дипломати туркман афзуд, ки дар доираи таҷлили Рӯзи ҷаҳонии туризм, ки ҳамасола 27 сентябр гузаронида мешавад, дар минтақаи сайёҳии Ачмани Туркманистон симпозиуми муштараки Тоҷикистону Туркманистон марбут ба масоили сайру саёҳат ва осоишгоҳӣ баргузор мегардад. Интизор меравад, ки дар он намояндагони бахшу ниҳодҳои саёҳии ҳар ду кишвар масъалаҳои оид ба тақвияти ҳамкориҳоро дар самти туризм матраҳ хоҳанд кард.