$30 ҳазор барои дарёфти қотилони Бобоевҳо

Душанбе, 14 июн. (АМИТ «Ховар», Фарзонаи Давлат).- Соҳибкорони вилояти Суғд барои нафароне, ки қотилони хонаводаи Бобоевҳоро ошкор менамоянд ва ё барои кушодани он мусоидат мекунанд, мукофотпулӣ ба маблағи 30 ҳазор доллари амрикоӣ муайян кардаанд. Сомонаи расмии Вазорати корҳои дохилии кишвар хабар медиҳад, ки соҳибкорони хуҷандӣ ҷиҳати пайгирии ин ҳодисаи нохуш ва минбаъд рух надодани чунин ҷиноят ба сари дигар соҳибкорон изҳори нигаронӣ карда, ба ин иқдом даст задаанд.Ёдрас мешавем, ки шаби 1-ум ба 2-юми июни соли равон шахсони номаълуми мусаллаҳ бо мақсади роҳзанӣ ба воситаи девор ба ҳавлии истиқоматии дар суроғаи шаҳраки Ғафуров, кӯчаи Султон Ахмедов, хонаи 9 воқеъ будаи шаҳрванд Аҳмадхӯҷа Бобоеви 40-сола ворид шуда, бо истифодаи яроқи оташфишони АКМ 5,45 мм, худаш ва ҳамсараш Бобоева Ҳаётхон Шукуровна, соли таваллудаш 1974, духтараш Бобоева Рухшона, соли таваллудаш 1997, писараш Бобоев Суҳроб, соли таваллудаш 1998-ро ба қатл расонида, писари дигараш Бобоев Санҷарбек, соли таваллудаш 2007-ро ба ҳаммомхонаи ҳавлии истиқоматиаш маҳкам карда, бо истифодаи монтеровкаи бо ҳамроҳии худ оварда, дари сандуқи оҳанини дар хонаи истиқоматӣ ҷойгиршударо шикаста, тахминан ба маблағи 30 ҳазор доллари ИМА ҷавоҳироти тиллоиро тасарруф намудаанд.Бо мақсади рӯйпуш намудани амали ҷинояткоронаи худ бо истифодаи сӯзишвории бензин хонаи истиқоматии шаҳрванд Аҳмадхӯрҷаро оташ зада, аз ҷойи ҳодиса ғайб задаанд. Ноболиғ Бобоев Санҷарбек бошад, аз дуди оташ заҳролуд гашта, дар ҳаммомхона ба ҳалокат расидааст.Айни замон барои ошкор намудани ин ҷинояти мудҳиш аз ҷониби гуруҳи тафтишотӣ-оперативӣ чорабиниҳои фаврӣ-ҷустуҷӯӣ идома дошта, тафтиши ҳодисаи мазкур зери назорати қатъии вазири корҳои дохилӣ қарор дорад.