445 ҳазор доллари ИМА барои беҳдошти аҳолии Ваҳдат

Душанбе, 11 июн.(АМИТ “Ховар”, Марзия Саидова).-Дар зарфи чор моҳи соли равон новобаста аз таъсири омилҳои берунӣ қисми даромади буҷети давлатии шаҳри Ваҳдат 116 % иҷро гардидааст. Ин матлаб имрӯз зимни баргузории муҳокимаи ошкорои парлумонӣ, ки дар Маҷлиси намояндагон бо иштироки намояндагони вазорату идораҳои марбутаи кишвар ва вакилони Парлумон доир гардид, зикр шуд. Дар муҳокимаи ошкорои парлумонӣ раванди иҷрои буҷети маҳаллии шаҳри Ваҳдат дар зарфи чор моҳи соли равон матраҳ гашт. Қайд гардид, ки алҳол дар шаҳри Ваҳдат 190 муассиса ва ташкилоти буҷетӣ, 42 корхонаи саноатӣ, 229 ҷамъияти саҳомӣ ва дорои масъулияташон гуногун, 6 ташкилоти бонкӣ, 3973 хоҷагии деҳқонии инфиродӣ ва 39 хоҷагии деҳқонии коллективӣ фаъолият мекунанд. Дар шаҳр 8 лоиҳаи муштараки инвеститсионӣ ба мабалғи 12,5 миллион доллари ИМА дар соҳаҳои гуногун татбиқ мегардад, ки он ба рушди бахши иқтисод ва ҳифзи иҷтимоии аҳолӣ мусоидат менамоянд. Дар гузориши Анвари Вайсиддин –раиси шаҳри Ваҳдат зикр шуд, ки алҳол барои рушди иқтисодиёт ва беҳдошти сатҳи аҳолии шаҳру деҳоти Ваҳдат аз ҳисоби маблағҳои Ҳукумати ҷумҳурӣ як қатор лоиҳаҳо, аз ҷумла барои беҳдошти таъмини аҳолӣ бо оби нушокӣ, таъмиру таҷдиди роҳҳои автомобилгарди байни деҳот, сохтмони нерӯгоҳи хурди барқӣ, ки дар маҷмӯъ 445 ҳазор доллари ИМА-ро ташкил медиҳанд, татбиқ карда мешаванд.