Эрон барои чопи 400 000 адад китоб кӯмак хохад кард

Душанбе, 6 июн.(АМИТ «Ховар», Марзия Саидова).- Масъалаи чопи китобҳои алифбои ниёгон барои толибилмони макотиби таҳсилоти ҳамагонии Тоҷикистон зимни мулоқоти Нуриддин Саидов –вазири маорифи Тоҷикистон бо Алиасғар Яздонӣ-муовини вазири омӯзиш ва парвариши Эрон ва Алиасғари Шеърдӯст –сафири Эрон дар Тоҷикистон дар Душанбе матраҳ гашт. Дар мулоқот вазири маорифи Тоҷикистон-Нуриддин Саидов аз муовини вазири омӯзиш ва парвариши Эрон хостааст, то дар чопи 10 номгӯй китоби адабӣ бо теъдоди 400 ҳазор кӯмак намояд. Намояндаи вазорати омӯзиш ва парвариш Эрон изҳор доштааст, ки бо назардошти имконоту шароити мавҷуда дар кишвараш масъалаи мазкурро пайгирӣ менамояд. Назар ба иттилои Маҳмудхон Шоев- сармутахассиси шуъбаи таъминоти ҳуқуқӣ ва котиботи Вазорати маорифи кишвар, мусоҳибон ҳамзамон соири масоили марбут ба таҳкими ҳамкориҳои Тоҷикистону Эронро дар бахши маориф баррасӣ намуда, пешниҳодҳои ҷолиб ироа намуданд. Хусусан дар мавриди ба роҳ мондани давраи омӯзиш ва такмили ихтисоси омӯзгорони фанни алифбои ниёгон дар Эрон табодули назар карда шуд. Маҳмудхон Шоев мегӯяд, ки омӯзиши алифбои ниёгон дар низоми таълимии соҳаи маорифи Тоҷикистон ҳамчун фан ба роҳ монда шудааст. Фанни алифбои ниёгон ба толибилмони синфҳои 4, 5, 6 ва 7- и мактабҳои таҳсилоти ҳамагонӣ ва донишҷӯёни факултаҳои филологии мактабҳои олии кишвар омӯзонида мешавад.