Иди кӯдакон

Душанбе, 4 июн. (АМИТ «Ховар»). – 3 июн рӯзномаи «Вечёрка» ва Маркази фарҳанги «Аржанг» ба ифтихори Рӯзи байналмилалии ҳифзи кӯдакон дар «Боғи пойтахт» — и шаҳри Душанбе Иди анъанавии кӯдаконро баргузор намуданд. Имсол тасмим гирифта шуд, ки тарбиягирандагони хона — интернатҳои минтақавӣ ба ин ид даъват карда шаванд. Дар робита бо ин, 200 нафар тарбиягирандагони мактаб — интернати ноҳияи Шаҳринав, ки таҳти парастории Донишгоҳи славянии Русия ва Тоҷикистон ва «Амонатбонк» — и қарор доранд, меҳмони сокинони Душанбе гардиданд. Ташкилкунандагони ин чорабинӣ, ҳамчунин ихтиёриёни созмони ғайриҳукуматии «Даст ба даст» дар ин рӯз ҷойҳои шоёни диққати пойтахти кишварро ба кӯдакон нишон доданд.Дар «Боғи Парчам» ва Боғи Устод Рӯдакӣ ба тарбиягирандагон дар бораи Нишону Парчами Ҷумҳурии Тоҷикистон ва аҳамияти онҳо барои тарбияи маънавии наврасон нақл карданд. Дар анҷоми ин чорабинӣ кӯдакон дар «Боғи пойтахт» истироҳату фароғат намуда, дар мусобиқаҳои варзишӣ иштирок намуданд. Хотирнишон месохем, ки Донишгоҳи славянии Русия ва Тоҷикистон, ҳамчунин Бонки давлатии «Амонатбонк» сарпарастони ин чорабинӣ буданд.