Ифшои истифодаи ғайримақсадноки мошинҳои хидматӣ

Қӯрғонтеппа, 26 июн. (АМИТ «Ховар», Мурод Сотиев). – Кормандони Назорати давлатии автомобилии вилояти Хатлон тайи панҷ моҳи соли равон 92 ҳазор ҳодисаи қонуншикании маъмуриро фош намуданд. Раиси вилояти Хатлон Ғайбулло Афзалов дар иҷлосияи Маҷлиси вакилони мардумии вилоят фаъолияти нозирони давлатии автомобилиро ба таври мусбат арзёбӣ карда, зикр намуд, ки онҳо 755 ҳодисаи дар ҳолати мастӣ идора намудани мошинҳо ва 369 ҳодисаи бидуни рақамҳои дахлдори давлатӣ идора кардани автомобилҳоро ошкор намудаанд. Ҳамчунин 61 ҳодисаи истифодаи ғайримақсадноки нақлиёти хидматӣ ошкор гардидааст.