Ихтироъкори беҳтарини Тоҷикистон муайян гардид

Душанбе, 12 июня. (АМИТ «Ховар», Покиза Маҳмадбекова). — Бахшида ба 20-солагии таъсисёбии Муассисаи давлатии «Маркази миллии патенту иттилоот»-и Вазорати рушди иқтисод ва савдои Ҷумҳурии Тоҷикистон 11 июни соли равон дар маҷмааи «Душанбе-плаза» конфронси минтақавӣ доир гардид. Дар кори конфронс муовини сарвазири Ҷумҳурии Тоҷикистон Руқия Қурбонова, вазири рушди иқтисод ва савдо Шариф Раҳимзода, директори Муассисаи давлатии «Маркази миллии патенту иттилоот» Ҷамшед Қурбонов, намояндагон аз идораҳои патентии ҷумҳуриҳои Арманистон, Қазоқистон, Қирғизистон, Федератсияи Русия, Ҷумҳурии Мардумии Чин, Идораи патентии Авруосиё ва Созмони умиҷаҳонии моликияти зеҳнӣ ширкат варзиданд. Дар рафти кори конфронс тибқи натиҷаҳаи озмуни «Ихтироъкори беҳтарини Ҷумҳурии Тоҷикистон дар солҳои 2011-2012» аз ҷониби Кумитаи тадорукот ба ғолибон «Нишони фахрӣ»-и Муассисаи давлатии «Маркази миллии патенту иттилоот, «Нишони Муассисаи давлатии «Маркази миллии патенту иттилоот», «Медали тилоии Блинников», «Медали тиллоии Созмони умиҷаҳонии моликияти зехнӣ», «Ифтихорнома» ва «Диплом»-ҳои махсуси чорабинӣ ва тӯҳфаҳои пуливу молӣ тақдим шуд. Аз ҷумла, номзади илмҳои кимиё, корманди Донишгоҳи миллии Тоҷикистон Раҳимова Мубаширхон Мирзоевна барои ихтирои «Тарзи ҳосил намудани намакҳои табобатӣ бо иловаҳои биологӣ барои ваннаҳо» сазовори «Медали тиллоии СУМЗ» ва ҳамчун «Ихтироъкори беҳтарини Тоҷикистон дар соли 2011-2012» дониста шуд. Аз ҷониби вазири рушди иқтисод ва савдои ҷумҳурӣ Шариф Раҳимзода 6 нафар корманди «Маркази миллии патенту иттилоот» бо «Ифтихорнома»-и Вазорат қадрдонӣ гардиданд. Дар анҷоми чорабинӣ байни Муассисаи давлатии «Маркази миллии патенту иттилоот» ва Идораи патентии Авруосиё Созишнома дар бораи пешниҳод намудани дастрасии маъхази патентию иттилоотии «ЕАПАТИС» ба китобхонаҳои оммавии Ҷумҳурии Тоҷикистон ба имзо расонида шуд.