Имзои 11 созишномаи грантию қарзӣ

Душанбе, 20 июн.(АМИТ «Ховар», Марзия Саидова).- «Ҷумҳурии Тоҷикистон аз аввали соли ҷорӣ бо ташкилотҳои байналмилалии молиявӣ ва кишварҳои донор 11 созишномаи грантӣ ва қарзӣ ба маблағи 899 миллион сомонӣ ба имзо расонидааст»- гуфт Сафаралӣ Наҷмиддинов-вазири молияи ҷумҳурӣ дирӯз дар Парлумони мамлакат. Вазир афзуд, ки аз 11 созишномаи ба имзо расонида 4 созишномаи қарзӣ ба маблағи 441 миллион сомонӣ ва 7 созишномаи грантӣ ба маблағи 460 миллион сомонӣ барои татбиқи лоиҳаҳои инвеститсионӣ дар соҳаҳои афзалиятноки иқтисодиёти кишварамон -энергетика, нақлиёт, кишоварзӣ, маориф ва тандурустӣ амалӣ мешаванд. Зикр гардид, ки имзои ин созишномаҳои қарзию грантӣ ҷиҳати ноил гардидан ба ҳадафҳои стратегии кишварамон – расидан ба истиқлолияти энергетикӣ, раҳоӣ аз бунбасти коммуникатсионӣ ва таъмини амнияти озуқаворӣ муосидат менамоянд.