Лю Кэтсин: «Ҳамкориҳои Душанбеву Сяменро вусъат медиҳем»

Душанбе, 20 июн. (АМИТ «Ховар», Афшини Муқим).- Дар мулоқоти Президенти Ҷумҳурии Тоҷикистон Эмомалӣ Раҳмон ва мири шаҳри Сямени Ҷумҳурии Мардумии Чин Лю Кэтсин як қатор масоили вобаста ба ҳамкориҳои гуногунҷанбаи Тоҷикистон ва шаҳри Сямени Чин мавриди баррасӣ қарор гирифтанд. Лю Кэтсин бо ёдоварӣ аз боздиди Президенти Тоҷикистон аз шаҳри Сямен, ки дар доираи сафари расмӣ ба Ҷумҳурии Мардумии Чин сурат гирифта буд, гуфт: «Боздиди Президенти Тоҷикистон аз Сямен имкониятҳои зиёдеро барои ба роҳ мондани ҳамкориҳои густурдаи мутақобилан судманд фароҳам овард».Вай иттилоъ дод, ки дар ин сафари корӣ ӯро як гуруҳ соҳибкорони бонуфузи чинӣ ҳамроҳӣ менамоянд ва эшон баъди боздид аз якчанд корхонаи истеҳсолии шаҳри Душанбе ният доранд, то ҳамкориҳои босамарро бо сохторҳои марбутаи ҷониби Тоҷикистон дар соҳаҳои бонкдорӣ, саноати хӯрокворӣ, саноати мошинсозӣ, сайёҳӣ ва амсоли инҳо ба роҳ монанд. Лю Кэтсин изҳори итминон намуд, ки дар оянда ҳамкориҳои бисёрҷониба миёни Душанбе ва шаҳри Сямен ба нафъи ҷонибҳо густариш хоҳанд ёфт.