Муҳокимаи татбиқи лоиҳаҳои муштарак

Душанбе, 7 июн. (АМИТ «Ховар», Покиза Маҳмадбекова). – 6 июн дар шаҳри Душанбе мулоқоти вазири молияи Тоҷикистон Сафаралӣ Наҷмуддинов ва ҳайати Хазинаи байналмилалии асъор бо роҳбарии коршиноси хазинаи мазкур Энрико Аав ва намояндаи доимии Хазинаи байналмилалии асъор дар Тоҷикистон Ари Айзен баргузор гардид. Тавре ки аз котиботи Вазорати молияи кишвар ба АМИТ «Ховар» хабар доданд, дар ҷараёни мулоқот перомуни масоили мубрам ва дурнамои ҳамкорӣ дар бахши сиёсати андоз ва корбурди он табодули афкор баргузор гардида, ба масоили татбиқи Кодекси андози амалкунандаи Ҷумҳурии Тоҷикистон таваҷҷӯҳи хоса зоҳир гардид.Ҷонибҳо дар ҷараёни мулоқот дурнамои рушди ҳамкории Тоҷикистон ва Хазинаи байналмилалии асъор ҷиҳати тарбияи кадрҳои баландихтисоси низоми андози кишвар ва истифодаи таҷрибаи пешқадами кишварҳои дигар дар ин самтро мавриди муҳокима қарор доданд.