Мулоқоти Рамазон Раҳимов бо Дабири кулли «Интерпол»

Душанбе, 11 июн. (АМИТ «Ховар», Лутфия Эшонқулова). – 10 июн вазири корҳои дохилии Ҷумҳурии Тоҷикистон Рамазон Раҳимов бо Дабири кулли «Интерпол» Роналд Кеннетт Нобл мулоқот анҷом дод. Ҷонибҳо дар ҷараёни мулоқот масоили ҳамкории муштарак дар мубориза бо ҷинояткорӣ, аз ҷумла масъалаи марбут ба рабудани мошинҳо ва таҷзияи онҳоро мавриди муҳокима қарор доданд. Рамазон Раҳимов зикр намуд, ки Вазорати корҳои дохилии Ҷумҳурии Тоҷикистон ва «Интерпол» дар ин самт ба натиҷаҳои қобили қабул ноил шудаанд. Роналд Кеннетт Нобл дар навбати худ зикр намуд, ки бо ибтикори Вазорати корҳои дохилии ҶТ табодули иттилоот ба манзури ҷустуҷӯи ҷинояткорон рушду густариш ёфта ва ҳамкории онҳо натиҷаҳои хуб бахшидаанд.Ҷонибҳо дар ҷараёни мулоқот аҳд намуданд, ки ҳамкории муштарак минбаъд ҳам вусъат дода шавад.