Намоишгоҳи байналмилалии «ИНТЕРЛЕГПРОМ – 2013»

Душанбе, 4 июн. (АМИТ «Ховар»). – Тавре ки аз Палатаи савдо ва саноати Тоҷикистон ба АМИТ «Ховар» хабар доданд, аз 5 то 8 июн дар шаҳри Душанбе Намоишгоҳ – ярмаркаи ҳафтуми байналмилалии «ИНТЕРЛЕГПРОМ – 2013» баргузор мешавад.Вазифаи асосии намоишгоҳ бо маҳсулот ва технологияҳои пешқадами саноати пахта, нассоҷӣ ва хӯрокворӣ, ҳамчунин имконоти содиротии кишварҳои ташкилкунандаи намоишгоҳ шинос намудани аҳли тиҷорат мебошад. Мувофиқи суханони ноиби ҳокими музофоти Хуросони Ҷумҳурии Исломии Эрон Муҳаллиёз Ҷамшедӣ, бахши нассоҷӣ соҳаи асосии саноати сабуки Эрон ба шумор рафта, аз нигоҳи истеҳсоли маҳсулот ва теъдоди кормандон мақоми аввалро касб мекунад. Дар намоишгоҳ 50 ширкати Эрон иштирок менамояд. Назар ба гуфтаи муовини раиси Палатаи савдо ва саноати ЧТ Асаналӣ Карамалиев, намоишгоҳ — ярмаркаи «ИНТЕРЛЕГПРОМ», ки дар ҳошияи Рӯзи кормандони саноати сабук ва нассоҷӣ доир мешавад, чорабинии калони ҳарсолаи байналмилалию иқтисодӣ гардидааст.