Озмуни «Ҷаҳони орӣ аз маводи нашъаовар»

Душанбе, 25 июн. (АМИТ «Ховар»). – Агентии назорати маводи нашъаовар ба манзури ташвиқу тарғиби тарзи солими зиндагӣ ба ташаккули ҳисси бадбинӣ нисбат ба маводи нашъаовар аз овони кӯдакӣ, дар ҳошияи чорабиниҳо бахшида ба Рӯзи умумиҷаҳонии мубориза бо маводи нашъаовар иқдомоти гуногунро рӯи кор меорад. Назар ба хабари маркази матбуоти Агентии назорати маводи нашъаовари кишвар, имсол Агентӣ бо дастгирии Созмони башардӯстонаи «СПИД Бунёди Шарқу Ғарб» — и Голландия байни кӯдакону наврасони минтақаҳои мухталифи Тоҷикистон якчанд озмунҳои расму сурат дар мавзӯи мубориза бо маводи нашъаоварро ташкил намуд. Озмуни якум 30 май дар шаҳри Хоруғи Вилояти Мухтори Кӯҳистони Бадахшон ва сипас дар ноҳияи Ашти вилояти Суғд баргузор гардид. Ҳамчунин 11 июн дар ноҳияи Қумсангири вилояти Хатлон чунин озмун ташкил гардид.