Парлумон ба қонуни Буҷети давлатӣ тағйирот ворид месозад

Душанбе, 17 июн.(АМИТ «Ховар», Марзия Саидова).- Дар ҷаласаи Шӯрои палатаи поёнии Парлумони Тоҷикистон, ки 17 июн таҳти раёсати Шукурҷон Зуҳуров, раиси Маҷлиси намояндагон доир гардид, маҷмӯи масъалаҳои марбут ба рушди бахшҳои иқтисодию иҷтимоии кишвар матраҳ гардиданд. Аъзои Шӯро лоиҳаи қонунҳои Ҷумҳурии Тоҷикистон «Дар бораи моҳипарварӣ, моҳигирӣ ва ҳифзи захираҳои моҳӣ», «Дар бораи фаъолияти волонтёрӣ», «Оид ба ворид намудани тағйиру илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2013», «Оид ба ворид намудани илова ба Қонуни Ҷумҳурии Тоҷикистон «Дар бораи санҷиши фаъолияти субъектҳои хоҷагидор дар Ҷумҳурии Тоҷикистон», «Оид ба ворид намудани илова ба Қонуни Ҷумҳурии Тоҷикистон «Дар бораи хизмати давлатӣ», «Оид ба ворид намудани тағйиру иловаҳо ба Кодекси мурофиавии ҷиноятии Ҷумҳурии Тоҷикистон», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи бехатарии радиатсионӣ»-ро баррасӣ карданд. Дар ҷаласа ҳамзамон Созишномаи қарзи имтиёзнок байни Ҳукумати Ҷумҳурии Тоҷикистон ва Бонки содироту воридоти Ҷумҳурии Мардумии Чин оид ба лоиҳаи «Барқарорсозии зеристгоҳи барқии Регар-500 кВт», Созишномаи қарзи имтиёзнок байни Ҳукумати Ҷумҳурии Тоҷикистон ва Бонки содироту воридоти Ҷумҳурии Мардумии Чин вобаста ба лоиҳаи «Низоми худкори идоракунии нақлиётӣ дар шаҳри Душанбе -«Шаҳри бехатар» муҳокима шуданд.Ҷиҳати боз ҳам такмил додани лоиҳаи қонунҳои зиркгардида раисони кумитаҳои Маҷлиси намояндагон Саиди Ёқубзод, Марҳабо Ҷабборова, Сафаралӣ Раҷабов, Убайдулло Давлатов, Маҳмадалӣ Ватанов, Олим Салимзода ва дигар аъзои Шӯрои палатаи поёнии Парлумони мамлакат фикру андешаҳояшонро иброз доштанд.