Пешгирии нашъамандӣ дар байни донишҷӯён

Душанбе, 7 июн. (АМИТ «Ховар», Ибодат Давлатова).-Кормандони шуъбаи назорати муомилоти маводи нашъаовар ва пешгирии нашъамандии Агентии назорати маводи нашъаовари назди Президенти Ҷумҳурии Тоҷикистон дар якҷоягӣ бо намояндагони шуъбаи ҷавонон, варзиш ва сайёҳии шаҳри Душанбе дар хобгоҳи донишҷӯёни Донишкадаи молия ва иқтисод вохӯрии пешгирикунандаи зиддинашъамандиро дар байни донишҷӯён баргузор намуданд.Дар вохӯрӣ кормандони агентӣ дар бораи маводи нашъаовари синтетикӣ, усулҳои пешниҳод кардани ин мавод аз тарафи нашъаҷаллобон ва зарари онҳо ба ҷисми инсон нақл намуданд. Инчунин рақамҳои телефони «Боварӣ» ва сомонаи агентиро ба иштирокчиён пешниҳод намуда, ба онҳо хотирасон намуданд, ки дилхоҳ вақт метавонанд оид ба саволҳои пайдошуда чӣ ба таври ошкоро ва чӣ ба таври махфӣ аз мутахассисон дар мавзӯи мазкур маслиҳат пурсанд. Кормандони шуъбаи ҷавонон, варзиш ва сайёҳии шаҳри Душанбе низ оид ба тарғиби тарзи ҳаёти солим дар байни ҷавонон суҳбатҳои судманд доир намуданд. Дар ин бора ба мухбири АМИТ «Ховар» аз Агентии назорати маводи нашъаовари назди Президенти Ҷумҳурии Тоҷикистон иттилоъ доданд.